SYUDAD SAN FERNANDO

Neng Adrian Lee G. Magcalas


Nung buri meng akit at mayamang pagumasdan
ing SM kabalitan mabilug bansang tibuan
“The longest mall” ngeni titulu ng tatangalan
nanu pa ing panenayan tara na’t bilisan,
munta tamu king syudad ning Balen Kapampangan -
karin king San Fernando, ban lalung kilalanan!

Nung keka yang pantunan lugal detang bibida
“Giant lanterns” king yatu bulalag at kilala
king pamagdulap mu pihung kabalen pelangga
San Fernando ituru ra itang kekang punta
lalu neng bulan pasku manayang mibabata
king sugirang parul - pialben yang mamye sigla.

Makalingwan wari Kapitolyung makapilmi
nung nu makalukluk gobernador a magsilbi
ninu mang mangutang pilmi ing kekang asabi
karin syudad San Fernando alakang kalili
dane wanan - dalan mu karas mu king palengki,
malapit king Cathedral ring pamasadang dyipni.

Syudad San Fernando - ikang sentru ning balen ku
keka manibatan utus probinsyang gubiernu
nung saglawayan mimu kabilyang milabas mu
karing dakal a sulatan, melimbag at libru,
iyabe lapang kutnan detang makudta tamu
sumiro alang kabas mamye ketang kinang mu!

Pabustan me Indung Balen, magdalit ya at magsunis
lug maluka mung poeta karing bersu nang ginulis,
Tagimpan nang pagdulapan; tumula kang e tatangis
At misale karing rosas... at tumaylang sari lambis;
‘Limbang na ka ban sagakgak, ban ‘waglit ing kalmang yawis
Ngening beytan ning bayaning... y Nicolasa P. Dayrit;
Magmasusi keng anak mu kaniang tulang sobra’t lambis
Kambe mug lingnp na’t lugud... Mayor Oscar S. Rodriguez!