PAMANDALO NANG RIZAL KING SAN FERNANDO

Neng Francisco M. Guinto
July 19, 2008

San Fernandong tibwan; ding supling mu’t daya
Ing lugud king balen king puso e mapda,
Dit man e peylupig ibat pa king mula
Laban karing daywan- a ‘lilung Kastila;
Panasbuk at pluma alang makasila
Sasyo alang kanglap… ba ’ta mung milaya!

Mumuna kareti—ila ding Hilario
Tubu Bo. San Juan tulid PASUDECO
Ing bale rang matwa yari ya keng bato
Adwa yang palapag matibe’t kongkreto;
Ketang balkonahe karin mipagkwento
Adwang mikapatad—Cecilio’t Tiburcio.

Samantala naman, ating istranghero
King istasyun ning tren keti San Fernando,
Ing aske na’t piblas marangal yang tao
At kayang pangutang bale ding Hilario;
Itang mamasada a matwang kutsero
Agad neng inatad… itang pasahero.

Inyang dalakit ne king tete linipat
Ing taong magsarya layun yang linakad,
Karas na king eran, linakbang, minukyat
Ngana: “Aku’y Rizal”—minyabing memasyag;
Ding mipagsalitang adwang mikapatad
Agyang mebigla la---seganan deng agad!

Ipagmaragul da ing kayang panyatang
At iti tinggen dang antimong dangalan,
Kaybat ning masaya a kapagmananwan
Biklat da’ng problema—ning Indung Balayan;
Pulyetos at aklat inggil keng “kimutan”
Kareng mikapatad…, miglakwan ya’y Rizal.

Dapot y Despujol, ‘tin yang direktiba
Pabante nong lubus,-- lubus nong pagwardia
Batangas, Laguna, Cavite’t Pampanga
Lalo na reng bale…, Rizal delawan na;
Dekap dong Hilario—mesukul, migdusa
Kerakpan lang librong gamit propaganda!

Kaybat nang miugse Rizal king Dapitan
Ding adwang Hilario peyaus da no man,
Nasa ring Kastila karelang patutwan
Rizal yang pekapun, managyag labanan;
Dapot di Tiburcio ero apatukyan
Ere penganyaya--- ing bayaning Rizal.

Dayang Kapampangan, king uyat mamagus
E ‘biasang duruku, ing bie man makatakmus,
Buryan da pang mate emu mabusabus
Ing dangal da’t puri king siwal migapus;
Nuwan lang Fernandino, pupugayang lubus
Tepangan da’t lugud--- keng laya menatbus!!