NINU Y DON PEDRO ABAD SANTOS?

Neng Felix M. Garcia

Ninung e makakila kang Don Pedro Abad Santos
A kabilang karing liping king tepangan mipabantug?
At mas biryan na pa keta ing bie maybug mate danup
Kesa king timawang bili a kemulatan nang lubus;
King ba’na mu sang apatpat ing sistemang e makatud
A mengibabo kanita king gamat ding asinderus;
Keta a nung insanu ring king marangle e patugut
Ilang alang ‘yuling pale keng bale neng papalut!

Makanano, kulang namu, ing e ra ngan solwan keta
Ding ganid a propetaryu, itang pupul king gabun da;
At pablasang ma-prinsipyung tau ketang panawun na
Ing land reform”, ditak-ditak pinla na nekanita pa;
Pati social justice program ning Presidente kanita,
E na pitakutan niting pinintas arap ning masa;
Pikanlapang de I Perico Central Luzon ding makwalta,
Uli na ning ukulan da iti suksuk ya karela.

Pablasang mibait ya man king dase ning kayatinan,
I Don Pedro simpli yamu at alang dit mang ketasan
Kaya ding pakakalulu, ilang dapat munang sawpan
At sukat nang ipagluwalu, laban king e karampatan;
Nung inyasa’t keti Central Luzon iya ing mitaguryan,
“Champion of the Peasants” ngara at peka-founder na bilang
Ning “Socialist Party.of the Philippines king kabilugan.

Bilang abogadu, e la ditak kilub ning aldoldo
Ding kalulung ortelanu pasawup kang Don Pedro
Karin, a nu ding kasawup na, lima lang abugadu,
Dapot libri mu ing serbisyung pagkalub na karing tau;
Misan,’ya pang babye kwalta ban asawpan na lang ustu
Detang alang pilisunan king kalukan a masolu;
At keta nung ating datang a mamitbit sa’ng rigalu,
King keraklan king magdala, ipauli naming pihu.

I Do Pedro makanyan ya kasampata a pilubluban
At e ya migkait sawup kenu pamang mengaylangan;
Nung inya king meginh bie na wa man e ibat king kalukan,
Biryan na pa king pakakalulu mu miglayunan;
Kabang king Balen Minalin niti sindu ing kimutan
A belangkas deti laban king e ustung kalakaran;
Angga na king iting labor leader taya misalunan,
At isuku na ing sabla king Ginung Dios a miglalalng